Koʻproq sunʼiy intellekt agentlari — yaxshiroq prognozlar degani emas
Tadqiqotlar GPT-5 natijalarni boshqa modellarga qaraganda yaxshiroq bashorat qilishini koʻrsatdi, biroq sunʼiy intellekt tajribali ekspertlar darajasidan hali ancha uzoq.
Tajriba uchun fantastik futbol ligasiga tarkib tanlaydigan va uni boshqaradigan sunʼiy intellekt agentlaridan iborat tizim yaratildi. Codexʼga ilmiy ishlar berildi, shundan soʻng u yangiliklar, oʻyin natijalari va prognoz modellarini tahlil qilish uchun yoʻriqnomalar hamda kod tuzdi. Alohida agentlar bir-birining takliflarini ham tekshirdi. Ularning sonini 100 nafardan oshirish tavsiyalarni deyarli yaxshilamadi, biroq API xarajatlarini oshirdi.
Chikago universiteti kompyuter fanlari mutaxassisi Xayfen Syuy yangi modellar koʻproq axborotni qayta ishlash va murakkab tizimlarni muvofiqlashtirish qobiliyati tufayli voqealarni yaxshiroq bashorat qilmoqda, deb hisoblaydi. Uning tadqiqotida modellar, masalan, NBA chempionati gʻolibini aniqladi. Eng yaxshi natijani GPT-5 koʻrsatdi, undan keyingi oʻrinlarni Grok 4, Claude Sonnet, Gemini va Llama egalladi.
Syuy hamkasblari bilan birga modellarning prognoz qilish qobiliyatini baholash uchun Prophet Arena testini yaratdi. Boshqa bir tajribada Prediction Arena doirasida modellarga prognoz bozorlarida 57 kun davomida tikish uchun 10 000 dollar berildi, biroq ular vaqt oʻtishi bilan natijalarini yaxshilagan boʻlsa-da, muntazam ravishda pul yoʻqotdi. Shunga qaramay, tajribali inson prognozchilari voqealarning sabablari va kontekstini tushunishda hamon sunʼiy intellektdan ustun.
Yana oʻqing
Oʻzbekiston davlat xaridlarini sunʼiy intellekt qanday tekshiradi
SI va ish17:55
Sunʼiy intellekt arxitekturani oʻzgartirmoqda: nega meʼmorlar oʻz kasbini qayta koʻrib chiqishi vaqti keldi
SI va ish12:45