Sunʼiy intellekt bank hisoblari va maʼlumotlarini oʻnlab yillar davomida himoya qilgan tizimlarni buzib kirishi mumkin
OpenAI modellari murakkab matematik masalalarni yechishda erishayotgan yutuqlar kriptografiyaning kelajagi borasida mutaxassislarning xavotirini kuchaytirdi.
Buyuk Britaniyaning moliyaviy tartibga solish va nazorat organi 50 ta yirik tashkilotda yangi vositani sinovdan oʻtkazmoqda. U ushbu tashkilotlarning sunʼiy intellekt va kvant hisoblash bilan bogʻliq kriptografik tahdidlarga qarshi turishga qay darajada tayyorligini baholashi kerak. Regulyator, shuningdek, mamlakatdagi 35 mingdan ortiq moliyaviy kompaniya bilan amaliy tavsiyalarni boʻlishishni rejalashtirmoqda.
Financial Times yozishicha, xavotirga OpenAI modellarining uzoq vaqt davomida olimlar uchun imkonsiz deb hisoblangan masalalarni yechishdagi yutuqlari sabab boʻlgan. Sohaga ixtisoslashgan assotsiatsiya matematiklarni kompaniya bilan hamkorlikni toʻxtatishga chaqirdi, shundan soʻng OpenAI ixtisoslashtirilgan jamgʻarmaga 5 million dollar xayriya qildi. Sunʼiy intellekt hozircha asosiy kriptografik usulni buzib kira olgani yoʻq, biroq mutaxassislar xavf ortib borayotganini aytmoqda: tizimlar algoritmlarni tezroq ishlab chiqmoqda va sonlar nazariyasiga oid masalalarni yechmoqda.
Avstraliyalik matematik Jordi Williamson sunʼiy intellekt rivoji zamonaviy kriptografiya asoslanadigan murakkablik tushunchasining oʻzini oʻzgartirayotganini hisoblaydi. Manchester universitetining kriptomatematika professori Daniel Shiu kvant hujumlaridan himoyalanish uchun yaratilgan, hali yetarlicha takomillashmagan algoritmlardagi zaifliklarni qayd etdi. AQSh, Xitoy va Germaniya kriptografik usullarni qayta koʻrib chiqmoqda, BT esa standartlar va tahdidlar oʻzgarib borgani sari tezroq yangilash mumkin boʻlgan yechimlarga oʻtishga tayyorgarlik koʻrmoqda.
