Oʻzbekiston fuqarolarni xorijda ishga joylashtirishni xususiy agentliklarga ishonib topshiradi
2027-yildan boshlab Oʻzbekiston fuqarolarini xorijga ishlash uchun yuborish bilan eng ishonchli xususiy agentliklar shugʻullanishi rejalashtirilmoqda. Ular har bir kishini yuqori maoshli lavozimga ishga joylashtirgani uchun 1,5 mln soʻm miqdorida toʻlov olishi koʻzda tutilmoqda.
Bu taklifni prezident Shavkat Mirziyoyev mehnat migratsiyasiga bagʻishlangan yigʻilishda ilgari surdi. Xususiy agentliklar uchun fuqarolarni amalda ishga joylashtirish, vakansiyaning vaʼda qilingan shartlarga muvofiqligi, ish haqi darajasi, migrantlar huquqlariga rioya etilishi hamda ijtimoiy kafolatlar mavjudligini hisobga oladigan reyting joriy etish rejalashtirilmoqda.
Agentliklarga fuqarolarga xorijda talab yuqori boʻlgan chet tillari va kasblarni oʻrgatish uchun texnikumlarning binolarini bepul ajratish rejalashtirilmoqda. Jalb etiladigan xorijlik oʻqituvchilar va ekspertlar uchun ijtimoiy soliq stavkasini 1 foiz etib belgilash, oʻquv jihozlarini esa bojxona bojlaridan ozod qilish taklif etilmoqda.
Davlat rahbari agentliklar faoliyati tartibini oʻzgartiradigan qaror loyihasini bir oy ichida ishlab chiqishni topshirdi. Ularning faoliyatini ijtimoiy xizmat deb eʼtirof etish taklif qilinmoqda — bu soliqqa tortish tartibini soddalashtirishi kerak. Xususiy tashkilotlar va davlat Migratsiya agentligi oʻrtasidagi vazifalar qanday taqsimlanishi hozircha belgilanmagan.
