Cyclon AI smartfoniga oldindan buyurtma olib, Google Pixel 8a prototipini bermoqda
Cyclon ishlab chiquvchilari 699 dollarlik AI smartfoniga oldindan buyurtma ochdi: AQShdagi ilk xaridorlarga 30 kun ichida Google Pixel 8a prototipi beriladi.
Rezervatsiya $199 turadi va yakuniy toʻlov amalga oshirilguniga qadar toʻliq qaytariladi. Bu summa qurilmaning taxminiy $699 narxiga hisoblanadi. Toʻlovdan oldin Cyclon yakuniy narx va havolani yuboradi, biroq pulni avtomatik yechib olmaydi.
AQShdagi birinchi partiya xaridorlari Google Pixel 8a qurilmasini Cyclon OS bilan qoʻshimcha toʻlovsiz oladi. Bu xizmatdan foydalanish uchun taqdim etiladigan dastlabki prototip boʻlib, Cyclon Phoneʼning oʻzi emas. Foydalanuvchilar AIʼga ilovalar bilan ishlash, xabar yuborish, qoʻngʻiroq qilish va vazifalarni fon rejimida bajarishni topshirishi mumkin.
Cyclon oʻz smartfonini 2027 yilning II choragida chiqarishni rejalashtirmoqda, biroq muddatlar FCC ruxsatiga bogʻliq. Oldindan buyurtma istalgan mamlakatdan berilishi mumkin, ammo qurilmaning oʻzini yetkazib berish shartlari hozircha eʼlon qilinmagan.
