Baidu AI haydashni AIga oʻrgatadigan Apollo World modelini koʻrsatdi

Model interaktiv virtual yoʻllar yaratib, haydovchisiz avtomobillarga buyurtmani qabul qilish, yoʻlovchilarni olish va tushirishni oʻz ichiga olgan toʻliq safarlarni mashq qildiradi. Kompaniya bunday ssenariylarni haydovchisiz xizmatlarni yangi bozorlarga chiqarishdan oldin qoʻllab, real sharoitdagi sinov xarajatlari va xatarlarini kamaytirmoqchi.

Apollo Worldʼda avtomobillar, piyodalar va harakatning boshqa ishtirokchilari mustaqil qaror qabul qilib, bir-biriga javob beradigan AI-agentlar sifatida ifodalanadi. Masalan, haydovchisiz avtomobil sekinlasa yoki qayta qatorga oʻtsa, boshqa agentlar xatti-harakatini oʻzgartiradi. Model real vaqt rejimida kameralar tasvirlari va lidar maʼlumotlarini yaratadi, har bir qarordan keyin virtual muhitni yangilaydi.

Kompaniya bahosiga koʻra, Apollo World bir kunda virtual bosib oʻtgan masofa xavfsizlik haydovchisi boshqaruvidagi real sinov avtomobilining uch yil uzluksiz yurishiga taxminan teng. Model foydalanish maʼlumotlaridan murakkab yoʻl vaziyatlari va xavfli ssenariylarni ajratib olib, ularni bort tizimlarini takomillashtirish uchun takroriy sinovlarga aylantiradi.

Reklama

Baidu Intelligent Driving Group bosh arxitektori Vang Liangning aytishicha, bunday modellar faqat realistik tasvirlar yaratmay, fizik qonunlar va sabab-oqibat bogʻliqliklarini ham takrorlashi kerak. Shunga qaramay, yangilangan tizimlarni yoʻllarda tekshirish talab etiladi: kompaniya texnologiya sinov xarajatlarini qanchalik kamaytirgani va xavfsizlikka qanday taʼsir qilganini oshkor qilmadi.

Apollo Go dunyoning 28 shahrida ishlaydi. Kompaniyaning ikkinchi chorak hisobotiga koʻra, xizmatning umumiy avtonom yurish masofasi 350 million kilometrdan oshgan, shundan 240 million kilometrdan koʻprogʻi toʻliq haydovchisiz yurishga toʻgʻri keladi.